Prosiectau Bychan a Ymdop 08

Prosiectau Bychan a Ymdop 2008

Mae Cyswllt Celf yn rheoli ac yn gweinyddu nifer o brosiectau bob blwyddyn i fudiadau eraill. Rydym hefyd yn gweithio mewn partneriaeth gyda mudiadau cyhoeddus a phreifat ar ystod o weithgareddau, gan gynnwys:

Gwyl Ffilm Ffilmic

Cynhaliwyd yr Gwyl Ffilm Ffilmic gyntaf erioed yn Theatr y Llwyn Llanfyllin ym mis Hydref 2007. Y cysyniad oedd dathlu diwylliant delweddau symudol, ac roedd amrediad o ffilmiau nodwedd, ffilmiau byrion, gweithdai a chyflwyniadau gan weithwyr proffesiynol yn y diwydiant ffilm ar gael. Bu plant a phobl ifanc yn cymryd rhan mewn gweithdai stop-ffrâm ac animeiddio. Yn ystod yr wythnos cyn yr wyl, bu disgyblion Ysgolion Cynradd ac Uwchradd Llanfyllin yn cymryd rhan mewn gweithdai ar lythrennedd ffilm a dweud straeon digidol.

Un o uchafbwyntiau’r penwythnos oedd dangos y ffilmiau oedd wedi cystadlu yn yr Her Ffilm Pum Diwrnod. Dim ond pum diwrnod oedd gan y cystadleuwyr i wneud ffilm pum munud o hyd. Roedd Theatr y Llwyn dan ei sang, a’r dorf yn dangos eu gwerthfawrogiad o’r rhai fu’n cystadlu. Cyflwynwyd y gwobrwyon gan Anthony Rosser, rheolwr cyffredinol Gwesty Llyn Efyrnwy, oedd wedi noddi’r gystadleuaeth, a nododd fod safon uchel y ffilmiau wedi’i blesio’n arw.

Ariannwyd Ffilmic gan Asiantaeth Ffilm Cymru gyda chefnogaeth gan Westy Llyn Efyrnwy a Gwesty’r Cain Llanfyllin, Cymdeithas Ffilm y Dyffrynnoedd a Siop Spar Llanfyllin.

Ewch i: www.ffilmic.co.uk am fwy o wybodaeth.

First Light Movies

Trwy gefnogaeth ariannol gan First Light Movies, roeddem yn gallu gweithio gyda 13 o bobl ifanc o Lanfyllin a’r ardal gyfagos i gynhyrchu ffilm 8 munud.

Bu’r prosiect yn rhedeg rhwng Ebrill a Mehefin 2008, pan fyddai’r grwp yn cwrdd bob wythnos gyda’r mentor ffilm Ruth Carter. Cawsant gyfle i ddysgu am y broses o wneud ffilmiau, o’r syniad cychwynnol i’r ffilm derfynol. Y man cychwyn oedd chwedlau lleol, a chrëwyd eu stori eu hunain yn seiliedig ar y Gweithdy yn Llanfyllin yn y 1800au. Lluniwyd sgript, daethpwyd o hyd i bropiau a gwisgoedd, dewiswyd lleoliadau, cynhaliwyd gweithdy recordio sain gyda Jacqui Bellamy, gweithdy drama gyda Sharon Calder, a gweithdy camera yng nghwmni Ruth Carter. Bu’r bobl ifanc yn gweithio yn yr un modd ag unrhyw griw ffilm, yn gweithredu naill ai fel aelodau’r cast neu griw, a thrwy hynny’n cael cyfle i fod yn rhan annatod o gynhyrchu’r ffilm. Treuliwyd 4 diwrnod ar leoliad o fewn tref Llanfyllin ac yn yr ardal gyfagos. Bu Greg Hall, awdur / cyfarwyddwr yn gyfrifol am weithdy cyfarwyddo, ac am eu cefnogi wrth sefydlu’r lleoliadau i’w ffilmio.

Dangoswyd y ffilm orffenedig, gyda’r teitl ‘Spirit of the Hollow Tree’ yn Theatr y Llwyn i gynulleidfa fawr o rieni, ffrindiau, athrawon a chynrychiolwyr mudiadau lleol oedd yn dangos eu gwerthfawrogiad o’r gwaith a wnaethpwyd.

ASIANTAETH YR AMGLUCHEDD CYMRYU - PROSIECT EOGIAID

Ar ddechrau 2008 cytunwyd i ofalu am lond tanc o wyau eogiaid fel rhan o gynllun Afon Cain, Asiantaeth yr Amgylchedd Cymru er mwyn codi ymwybyddiaeth ynghylch llygredd dwr gwasgaredig. Yn ogystal â galluogi’r gymuned i wylio’r wyau’n deor a’u gweld yn datblygu, trefnwyd prosiect celf mewn partneriaeth gydag Asiantaeth yr Amgylchedd Cymru.

Aeth Ingrid Maugham i ymweld ag Ysgol Llanfechain, lle dysgodd y plant am gylch bywyd eogiaid, a chawsant gyfle i addurno eog pren gan ddangos manylder anhygoel, a llwyddo i greu deilliannau artistig gwych. Roedd yr eogiaid gorffenedig yn rhan o arddangosfa tu allan i’r Ganolfan Ieuenctid a Chymuned, cyn bod yn rhan o orymdaith trwy dref Llanfyllin gan y 40 o blant oedd wedi cyfrannu. Ar Faes Sioe Llanfyllin, rhoddwyd cyfle i bob plentyn ryddhau’r eogiaid o’r tanc i’r afon. Cafodd y prosiect llawer o gyhoeddusrwydd trwy Gymru gyfan.

Gwyliwch Ffilm am Eog yma.

DYDDIAU CELF I’R TEULU

Cafwyd llawer o hwyl gan deuluoedd yn ystod hanner tymor mis Chwefror 2008, wrth gymryd rhan mewn gweithdy argraffu stensiliau yng ngofal Ingrid Maugham, pan gawsant gyfle i ddylunio eu delweddau eu hunain a chreu lluniau penigamp. Roedd cyfle hefyd i gymryd rhan mewn gweithdy dawns a drama gyda Sally Russell a Sharon Calder. Cafwyd hwyl aruthrol yn gwneud masgiau a gwisgoedd i actio hanes Gwrtheyrn a’r Ddraig.

Caryl Parry Jones

Roedd yn bleser gweithio mewn partneriaeth gyda’r Gymdeithas Gymraeg a Merched y Wawr i groesawu Caryl Parry Jones, Bardd Plant Cymru 2007, i dref Llanfyllin.

Cafodd Caryl ddiwrnod llawn gweithgareddau wrth iddi ymweld ag Ysgol Gynradd Llanfyllin lle cafodd y plant llawer o hwyl a sbri’n chwerthin ar y cerddi a greodd trwy ddefnyddio eu henwau. Yn y prynhawn aeth i Ysgol Uwchradd Llanfyllin, lle bu’n gweithio gyda’r myfyrwyr i lunio limrigau, ac yna gyda’r hwyr, aeth i ddathliadau 40fed pen-blwydd Merched y Wawr, ar y thema rhuddem.

ADRODD STRAEON GYDA MAIR TOMOS IFANS

Diolch i’r arian a godwyd o werthu’r cryno ddisgiau o hwiangerddi gyda’r teitl Jac-y-Do a gynhyrchwyd gyda naw o ysgolion cynradd Gogledd Powys, roeddem yn gallu ariannu ymweliad gan Mair â‘r naw ysgol i gynnal gweithdai adrodd straeon. Roedd Mair yn adrodd straeon traddodiadol yn Gymraeg ac yn Saesneg. Ar ôl gwrando ar straeon megis Y Delyn Aur, Melangell ac Owain Glyndwr, bu’r plant yn cymryd rhan mewn gweithdai drama’n seiliedig ar yr hanesion, gan bortreadu’r cymeriadau trwy symudiadau. Wedyn perfformiwyd hyn o flaen disgyblion eraill yr ysgol. Bu’r plant hefyd yn canu caneuon, gyda Mair yn cyfeilio ar y delyn.

Aeth Mair hefyd i Ysgol Oldford i gynnal gweithdai adrodd straeon trwy gerddoriaeth, a ariannwyd gan Gronfa Gerdd Cymunedau yn Gyntaf.

Proseictau a Reolwyd

GWASANAETH IEUENCTID POWYS

Eleni, rydym wedi rheoli ystod eang o brosiectau yng Nghanolfannau Ieuenctid Gogledd Powys, sef Machynlleth, Llanfair, Llanfyllin, Y Drenewydd, Llanidloes, Trallwng. Rydym wedi trefnu gweithdai mewn graffiti, argraffu crysau-T, drama, bol-ddawnsio, dawnsio stryd, pypedau cysgod, drymio Affricanaidd, ac rydym hefyd wedi cyfrannu at greu DVD ar Barc Sgrialu Y Trallwng.

Cefnogwyd Gwyl Ieuenctid Gwasanaeth Ieuenctid CS Powys ym mis Tachwedd 2007. Daeth 150 o bobl ifanc ynghyd ar y diwrnod, a buont yn cydweithio i gynhyrchu byrddau graffiti ar themâu amrywiol yng nghwmni Tony Wainwright a Tish Evans. Cawsant hefyd gyfle i ddysgu sut i drawsosod eu syniadau creadigol i sidan mewn gweithdy cychwynnol ar baentio ar sidan dan ofal Sally Duckers. Roedd y canlyniadau’n hardd dros ben, a’r cyfranogwyr yn falch iawn o’r hyn a gyflawnwyd.

CYMUNEDAU YN GYNTAF

Darparwyd gweithdai celf ar gyfer Diwrnod Cymunedol Oldford a Diwrnod o Hwyl Oldford. Bu cyfranogwyr yn mwynhau sesiynau mosaig, gwneud offerynnau cerdd o jync, sgiliau syrcas, dweud straeon, dawnsio stryd, gwneud gemwaith a gwaith metel.

CYSTADLEUAETH FFOTOGRAFFIAETH

Bu Cyswllt Celf yn cefnogi’r Gymdeithas Ddinesig ac Asiantaeth yr Amgylchedd Cymru gyda’r gystadleuaeth ffotograffiaeth, a bu nifer fawr o bobl sy’n byw yn Nyffryn Cain yn cystadlu. Mae Asiantaeth yr Amgylchedd yn gobeithio cyhoeddi’r ffotograffau mewn calendr ar gyfer y Flwyddyn Newydd.

CYFRIFIAD IEUENCTID

Cymerodd 213 o ddisgyblion Ysgol Uwchradd Llanfyllin ran mewn Cyfrifiad Ieuenctid ym mis Mehefin 2008. Gofynnwyd cyfres o gwestiynau dewis lluosog iddynt ar bynciau amrywiol. Roeddynt yn pleidleisio trwy ddefnyddio pad electronig oedd yn golygu fod y cyfrifiad yn ddienw, yn rhyngweithiol ac yn hwyl.

Arweinydd y prosiect oedd Tom Cavalot, ac roedd yn ei gynnal fel rhan o’i radd MA mewn Astudiaethau Ieuenctid a Chymuned. Fe’i ariannwyd gan y Gronfa Gweithredu dros Gymunedau Gwledig, ac fe’i gefnogwyd gan NEWI Wrecsam, Dux o Wasanaeth Ieuenctid Powys a Chyswllt Celf. Gellir lawrlwytho’r adroddiad cyflawn o’n gwefan. The full report can be downloaded here.